ଜଣା ଅଜଣା

ଓଡ଼ିଆ ଭାଷାର ପ୍ରଥମ ଚଳଚ୍ଚିତ୍ର

ଲେଖା: ଦେଵ ତ୍ରିପାଠୀ
୧୯୩୬ ମସିହା, ଏପ୍ରିଲ ୨୮, ମଙ୍ଗଳବାର, ଲକ୍ଷ୍ମୀ ଟକିଜ୍, ପୁରୀ ।
ସେଦିନ ଥିଲା ଜାତୀୟଗୌରବ କୁଳବୃଦ୍ଧ ମଧୁସୂଦନଙ୍କ ପବିତ୍ର ଜନ୍ମତିଥି । ସ୍ବତନ୍ତ୍ର ଉତ୍କଳପ୍ରଦେଶ ଗଠନର ସୁଖଦ ଅନୁଭଵ ଆଣିଦେଇଛି ଓଡିଆଙ୍କୁ । ସେଭଳି ଖୁସିକୁ ଦ୍ଵିଗୁଣିତ କରିବା ପାଇଁ ଏଇ ଦିନରେ ଓଡ଼ିଆଙ୍କୁ ମିଳିଛି ଏକ ସ୍ବତନ୍ତ୍ର ଉପହାର, ଏ ମାଟିର ଭାଷାରେ ତିଆରି ପ୍ରଥମ କଥାକୁହା ଚଳଚ୍ଚିତ୍ର “ସୀତାବିବାହ”, ଏ ସୈାଭାଗ୍ୟ ଥିଲା ଓଡ଼ିଆଙ୍କ ପାଇଁ ଏକ ନୂତନ ସକାଳର ସ୍ବର୍ଣ୍ଣିମଲଗ୍ନ ।
ବିଚିତ୍ର ରାମାୟଣର କଥାବସ୍ତୁକୁ ନେଇ ନାଟ୍ୟକାର କାମପାଳ ମିଶ୍ର କଳ୍ପନା କରିଥିଲେ ଓଡ଼ିଆ ଭାଷାର ପ୍ରଥମ ଚଳଚ୍ଚିତ୍ର ସୀତାବିବାହର ପୃଷ୍ଠଭୂମି । ଋଷି ବିଶ୍ଵାମିତ୍ରଙ୍କ ଅନୁରୋଧ କ୍ରମେ ଯଜ୍ଞସ୍ଥଳୀରେ ଭୟଙ୍କର ତାଣ୍ଡବ ସୃଷ୍ଟି କରୁଥିବା ତାଡକାସୁରକୁ ଶ୍ରୀରାମଚନ୍ଦ୍ର ବଧ କରିବାଠାରୁ ଶିବଧନୁ ଭଙ୍ଗ, ସୀତାଙ୍କ ବିବାହ ପର୍ଯ୍ୟନ୍ତ ଦୃଶ୍ୟାବଳୀର ପରିକଳ୍ପନା କରିଥିଲେ ପଣ୍ଡିତ ମିଶ୍ର ।
ହରିଚରଣ ମହାନ୍ତିଙ୍କ ସଙ୍ଗୀତ ନିର୍ଦ୍ଦେଶନାରେ କବିସମ୍ରାଟ ଉପେନ୍ଦ୍ର ଭଞ୍ଜଙ୍କ ବୈଦେହୀଶ ବିଳାସର କିଛି ଛାନ୍ଦ ଏବଂ ବିଚିତ୍ର ରାମାୟଣର କିଛି ଗୀତକୁ ନିର୍ବାଚିତ କରିସାରିଥିଲେ ପଣ୍ଡିତ ମିଶ୍ର ।  କାଳି ଫିଲ୍ମସ୍ ବ୍ୟାନରରେ କଥାବସ୍ତୁକୁ ଚିତ୍ର ରୂପ ଦେବା ପାଇଁ ଆଗେଇ ଆସିଥିଲେ ପ୍ରିୟନାଥ ଗାଙ୍ଗୁଲି ଓ ଚଣ୍ଡୀଚରଣ ସାହା । ତେବେ ଗାଙ୍ଗୁଲି ମହାଶୟ କଥାଚିତ୍ରର ସମସ୍ତ ଖର୍ଚ୍ଚ ବହନ କରିଥିଲେ ମଧ୍ୟ ନିଜର ପୂଜ୍ୟ ଗୁରୁ ମୋହନ ସୁନ୍ଦରଦେବ ଗୋସ୍ୱାମୀଙ୍କୁ ପ୍ରଯୋଜକ ଓ ନିର୍ଦ୍ଦେଶକ ଭାବେ ଘୋଷଣା କରିଥିଲେ ।
ମୋହନସୁନ୍ଦର ଏ ଚଳଚ୍ଚିତ୍ରରେ ବିଶ୍ଵାମିତ୍ରଙ୍କ ଭୂମିକା ନିର୍ବାହ ସହିତ ସଂଯୋଜନାର ଦାୟିତ୍ଵ ଗ୍ରହଣ କରିଥିଲେ । ଗୀତିକାର ତଥା ଅନ୍ୟ ମୁଖ୍ୟ କଳାକାର ନୃସିଂହ ନନ୍ଦଙ୍କ ଏକ ଗୀତ ସହିତ ମୋହନସୁନ୍ଦର ମଧ୍ୟ ରଚିଥିଲେ ଏକ ଗୀତ । ତିରିଶ ହଜାର ଟଙ୍କାରେ ନିର୍ମିତ ଏହି ଚଳଚ୍ଚିତ୍ରରେ ମୋହନ ସାନ୍ୟାଲ ଚିତ୍ର ଉତ୍ତୋଳନ ସହିତ ସହ-ନିର୍ଦ୍ଦେଶକର ଦାୟିତ୍ବ ତୁଲାଇଥିଲେ ।
ମାତୃଭାଷାର ପ୍ରଥମ ଚଳଚ୍ଚିତ୍ର ହୋଇଥିବା କାରଣରୁ ପ୍ରତ୍ୟେକ ଦର୍ଶକ ଏହାକୁ ଥରୁଟିଏ ହେଲେ ମଧ୍ୟ ଦେଖିବାକୁ ଭୁଲି ନ ଥିଲେ, ମାତ୍ର ମୋହନ ସୁନ୍ଦର ଦେବ ଏ ଚଳଚ୍ଚିତ୍ର ନିର୍ମାଣ ବାବଦରେ ଖର୍ଚ୍ଚର ଭରଣା ପାଇ ପାରି ନ ଥିବା ଏବଂ ପରବର୍ତ୍ତୀ ଦୀର୍ଘ ସମୟ ପର୍ଯ୍ୟନ୍ତ କୌଣସି ନୂତନ ଚିତ୍ର ପ୍ରସ୍ତୁତ ନ ହୋଇପାରିବା କାରଣରୁ ଏହାକୁ କେହି କେହି ଗବେଷକ ସଫଳ ଚିତ୍ରର ମାନ୍ୟତା ଦିଅନ୍ତି ନାହିଁ ।
ଯାହା ହେଉ ନା କାହିଁକି, ଓଡ଼ିଆ ଭାଷାର ପ୍ରଥମ ଚଳଚ୍ଚିତ୍ର ପ୍ରସ୍ତୁତି ବାବଦରେ କାମପାଳ ମିଶ୍ରଙ୍କ ନିଷ୍ଠା ଓ ଅଧ୍ୟବସାୟ, ପ୍ରିୟନାଥ ଗାଙ୍ଗୁଲିଙ୍କ ତ୍ୟାଗ ଏବଂ ମୋହନ ସୁନ୍ଦରଦେବଙ୍କ ଅକ୍ଳାନ୍ତ ପରିଶ୍ରମ ନିଶ୍ଚିତ ଭାବରେ ସ୍ବୀକାର୍ଯ୍ୟ ।
Spread the love
admin

Recent Posts

ଡ. ଅନ୍ନପୂର୍ଣ୍ଣା ମହାରଣା

~ ଲେଖିକା ଡ. ଅନ୍ନପୂର୍ଣ୍ଣା ମହାରଣା (ଚୁନୁ ଅପା) ~ ଉପସ୍ଥାପନା: ଅନିଲ କୁମାର ପାଣିଗ୍ରାହୀଆବିର୍ଭାବ: ୩ ନଭେମ୍ବର ୧୯୧୭…

2 weeks ago

କବି ବିନୋଦଚନ୍ଦ୍ର ନାୟକ

~ 'ଗ୍ରାମପଥ'ର ବିଦଗ୍ଧ ପଥିକ କବି ଡ. ବିନୋଦଚନ୍ଦ୍ର ନାୟକ ~ ଉପସ୍ଥାପନା: ଅନିଲ କୁମାର ପାଣିଗ୍ରାହୀ ଆବିର୍ଭାବ :…

2 weeks ago

ତିଗିରିଆ ଗଡ଼ଜାତର ଉତ୍ପତ୍ତି ଓ ଇତିହାସ

ତିଗିରିଆ ଗଡ଼ଜାତର ଉତ୍ପତ୍ତି ଓ ଇତିହାସ ଉପସ୍ଥାପନା: ପ୍ରଶାନ୍ତ କୁମାର ଦାସ ଓଡ଼ିଶାର ଗଡ଼ଜାତ ରାଜ୍ୟଗୁଡ଼ିକ ମଧ୍ୟରେ ତିଗିରିଆ ଗଡ଼ଜାତର…

2 weeks ago

ଆଠଗଡ଼ପାଟଣା ଇତିହାସ

~ ଭୋଗବିଳାସ, ବିଶ୍ୱାସଘାତକତାରେ ରାଜ୍ୟ ହରାଇଥିବା ଏକ ରାଜାଙ୍କ କରୁଣ ଇତିହାସ ~ ଉପସ୍ଥାପନା: ପ୍ରଶାନ୍ତ କୁମାର ଦାସ ନୟାଗଡ଼…

3 weeks ago

ନୟାଗଡ଼ର ମା’ ମଙ୍ଗଳା

~ ନୟାଗଡ଼ର ମା' ମଙ୍ଗଳା ~ ଉପସ୍ଥାପନା: ପ୍ରଶାନ୍ତ କୁମାର ଦାସ ଓଡ଼ିଶା ପ୍ରସିଦ୍ଧ କାକଟପୁର ଅଧିଷ୍ଠାତ୍ରୀ ଦେବୀ ମା'…

3 months ago

ନୟାଗଡ଼ ପ୍ରଜାମଣ୍ଡଳ ଆନ୍ଦୋଳନ

ନୟାଗଡ଼ ପ୍ରଜାମଣ୍ଡଳ ଆନ୍ଦୋଳନ ଉପସ୍ଥାପନା: ପ୍ରଶାନ୍ତ କୁମାର ଦାସ ନୟାଗଡ଼ ପ୍ରଜାମଣ୍ଡଳ ଆନ୍ଦୋଳନର କଥା ଉଠିଲେ ସାଧାରଣତଃ ଆମ ମନରେ…

3 months ago