ସିଦ୍ଧେଶ୍ୱର ମହାଦେବ ମନ୍ଦିର

ଲେଖା: ତ୍ରିଲୋଚନ ସ୍ୱାଇଁ

~ ସିଦ୍ଧେଶ୍ୱର ମହାଦେବ ମନ୍ଦିର ~

ସିଦ୍ଧିକ୍ଷେତ୍ର ଶ୍ରୀ ସିଦ୍ଧେଶ୍ୱର ମହାଦେବ ମନ୍ଦିର, ଯେଉଁଠି ଆଶୁତୋଷ ମହାଦେବ ଭକ୍ତର ସମସ୍ତ ମନବାଞ୍ଛା ପୂର୍ଣ୍ଣ କରନ୍ତି l ସ୍ୱଚ୍ଛ ମନ ଆଉ ପବିତ୍ର ହୃଦୟନେଇ ଯେ କେହି ବି ଏଠାରେ ମହାଦେବଙ୍କୁ ପୂଜା ଆରାଧନା କଲେ ତାକୁ ସିଦ୍ଧିପ୍ରାପ୍ତ ହୁଏ ବୋଲି ଦୃଢ଼ ବିଶ୍ୱାସ ରହିଛି l

କୁହାଯାଏ ଦ୍ୱାପର ଯୁଗରେ, ବନବାସ ସମୟରେ, ପାଣ୍ଡଵମାନେ ଏହିସ୍ଥାନରେ କିଛି କାଳ ଅବସ୍ଥାନ କରିଥିଲେ ଆଉ ତୃତୀୟ ପାଣ୍ଡଵ ସବ୍ୟସାଚୀ ଏଠାରେ ପବିତ୍ର ଶିବଲିଙ୍ଗ ପ୍ରତିଷ୍ଠା କରିଥିଲେ l ଆଶୁତୋଷ ମହାଦେବଙ୍କୁ ଆରାଧନା କରି ସେ ସିଦ୍ଧିପ୍ରାପ୍ତ ହୋଇଥିବାରୁ ଏହି ପୀଠ ଓ ମହାଦେବଙ୍କ ନାଁ ସିଦ୍ଧେଶ୍ବର l

କୁହାଯାଏ ମହାଭାରତ ଯୁଗର ପରବର୍ତ୍ତୀ ସମୟରେ ବୌଦ୍ଧମାନେ ମଧ୍ୟ ଏହି ପାହାଡ଼ ଗୁମ୍ଫାରେ ରହି ତପସାଧନା କରୁଥିଲେ l ଅବଶ୍ୟ ଏହାକୁ ସିଦ୍ଧପ୍ରମାଣ କରିବା ପାଇଁ ଏଠାରେ କୌଣସି ବୌଦ୍ଧସ୍ମାରକ ଦେଖିବାକୁ ମିଳେନାହିଁ l

କଟକ ସହର ଠାରୁ ମାତ୍ର ଷୋହଳ ସତର କିଲୋମିଟର ଦୂରରେ, ନରାଜ ବ୍ୟାରେଜ ପରେ ପରେ ଏକ ଛୋଟିଆ ଓ ସ୍ୱଳ୍ପ ଉଚ୍ଚ ପାହାଡ଼ ଉପରେ ରହିଛି ପୂରାଣ ବର୍ଣ୍ଣିତ ଏହିସିଦ୍ଧେଶ୍ୱରମହାଦେବ ମନ୍ଦିର l ଆଉ ପାହାଡ଼ ପାଦଦେଶରେ ବହି ଯାଉଛି ଚିରସ୍ରୋତା ମହାନଦୀ l

ସ୍ଥାନଟି ଖୁବ୍ ସୁନ୍ଦର ଆଉ ମନମୁଗ୍ଧକର l ପାହାଡ଼ ଉପରେ ଓ ଚତୁଃପାର୍ଶ୍ୱରେ ଥିବା ସବୁଜ ବୃକ୍ଷରାଜି, ପାହାଡ଼ ତଳେ ମହାନଦୀର ନୀଳ ଜଳରାଶି ଆଉ ମୁଣ୍ଡ ଉପରେ ଅନନ୍ତ ନୀଳ ଆକାଶ, ଯେ କୌଣସି ମଣିଷର ମନ ମୋହିନେବାକୁ ଯଥେଷ୍ଟ l ପ୍ରକୃତିର ଅପରୂପ ସୌନ୍ଦର୍ଯ୍ୟକୁ ଶବ୍ଦରେ ବର୍ଣ୍ଣନା କରିବା ସହଜ ନୁହେଁ l

#ଶ୍ରୀସିଦ୍ଧେଶ୍ୱର

#ପାବାନକ୍ଷେତ୍ର

Spread the love