ପ୍ରଥମାଷ୍ଟମୀ ଦିନ ଆଉ ଗୋଟେ ସୁନ୍ଦର ପରମ୍ପରାର ଆରମ୍ଭ ହୁଏ । ତାହ ହେଲା ବଡ଼ି ପକା ବା ବଡି ଅନୁକୂଳ । ଏଇ ଦିନ ହିଁ ଏ ବର୍ଷର ପ୍ରଥମ ବଡି ପଡ଼େ । ଅଳ୍ପ ବିରିବଟାକୁ ଫେଣେଇ ବଡିର ଶୁଭାରମ୍ଭ କରନ୍ତି ଆମ ଓଡ଼ିଆ ମା’ମାନେ । ତାକୁ ଫୁଲ, ସିନ୍ଦୁର, ଦୁବ, ବରକୋଳି ପତ୍ର ଦେଇ ବନ୍ଦାପନା ମଧ୍ୟ କରନ୍ତି। ଏହାପରେ ଆରମ୍ଭ ହୋଇଯାଏ ବିଭିନ୍ନ ରକମର ବଡିପକା । ଓଡ଼ିଆ ଗୃହିଣୀମାନେ ହାଲୁକା ଖରାରେ ବସି ଶୀତୁଆ ସକାଳରେ ଶରୀରକୁ ଭିଟାମିନ ଡି ଯୋଗାଇବା ସହ ଖରାଦିନିଆ ପଖାଳର ଘନିଷ୍ଠ ବନ୍ଧୁକୁ ରୂପ ଦିଅନ୍ତି । ଯେମିତି ସବୁ ଭଲ ଅଭ୍ୟାସ ପରସ୍ପର ସହିତ ଛନ୍ଦି ହେଇ ରହିଛନ୍ତି ।