ବଉଳା ଗାଈ

ସୌରଭିତ ସୃଷ୍ଟି: ବଳରାମ ଦାସ

କବି ବାଲ୍ମୀକି ପ୍ରଭୁ ରାମଚନ୍ଦ୍ରଙ୍କର ଜୀବନ କାହାଣୀକୁ ନେଇ ସଂସ୍କୃତରେ ସାତଖଣ୍ଡ ରାମାୟଣ ଲେଖିଲେ। ଏହି ସଂସ୍କୃତ କାହାଣୀକୁ ପଢି ବୁଝି ଜଗନ୍ନାଥ ଦାସଙ୍କ ସାଙ୍ଗ ବଳରାମ ଦାସ ଓଡ଼ିଆମାନଙ୍କ ପାଇଁ ଓଡ଼ିଆ ଭାଷାରେ ଲେଖିଦେଲେ ରାମଚନ୍ଦ୍ରଙ୍କର ଜୀବନ କଥା। ଲେଖୁ ଲେଖୁ କିଛି ନୂଆ କଥା ବି ଖଞ୍ଜିଦେଲେ।ତାହା ହିଁ ତାଙ୍କର ମୌଳିକତା ! ଯେମିତି କୁକୁଡା ମୁଣ୍ଡରେ ମୁକୁଟ କଣ ପାଇଁ ହେଲା, ବଗ ପଞ୍ଚକ କରି କେମିତି ମାଛ ଖାଏ ନାହିଁ, ଗୁଣ୍ଡୁଚି ପିଠିରେ ଗାର କାହିଁକି ହେଲା — ଏହିସବୁ ମନଲାଖି ମଜାକଥା ମନରୁ ପାଞ୍ଚି କବି ଆମ ପାଇଁ ଲେଖି ଯାଇଛନ୍ତି।

ଖାଲି ରାମାୟଣ ନୁହେଁ, ସେ ଆହୁରି ଅନେକ ବହି ଲେଖିଛନ୍ତି। ସାହିତ୍ୟ ବହି ଭିତରେ ବଉଳା ଗାଈ ଅଧ୍ୟାୟ ଗୋଟିଏ ମୁକ୍ତା, ଯାହା ପ୍ରାୟ ପ୍ରତ୍ୟେକ ଓଡିଆଙ୍କୁ ଜଣା ଥିବ। ପିଲାଙ୍କ ପଢା ବହିରେ ଆଗରୁ ବଉଳା ଗାଈ ବିଷୟରେ କବିତାଟିଏ ଥିଲା। କବିତାଟି ପିଲାଦିନ କଥା ମନେ ପକାଇ ଦେବ। ଚମତ୍କାର ଏ କବିତାର ଅନ୍ତର୍ନିହିତ ଭାବ ଓ ଆବେଗ।

~ ବଉଳା ଗାଈ ~

ଘରେ ଛାଡି ଟିକି ବାଛୁରୀ ଦିନେ ବଉଳା ଗାଈ,

ଯାଇଥିଲା ପାଖ ବନସ୍ତେ ନିଜେ ଚରିବା ପାଇଁ।

ବନସ୍ତର ଲତା ପତର ଖାଇ ଉଦର ଭରି,

ଫେରୁଥିଲା ସଞ୍ଜେ ବଉଳା ସବୁଦିନିକା ପରି।

ଛୁଆ କଥା ଭାବି ମନ ତା ହେଉଥିଲା ଉଚ୍ଛନ୍ନ,

ଦୁଧ ବିନା ହୋଇ ବିକଳ କାନ୍ଦୁଥିବ ତା ଧନ।

ଛନ ଛନ ମନେ ବଉଳା ଧାଏଁ ବନ ପଥରେ,

ଦେଖି ମଝିବାଟେ ବାଘକୁ ଭୟେ ହୃଦୟ ଥରେ।

ବଉଳାକୁ ଦେଖି ଆନନ୍ଦେ ବାଘ ମେଲାଏ ପାଟି,

ଚାଟେ ଓଠ ଜିଭ ବୁଲାଇ ଚାହେଁ ଆଖି ତରାଟି।

କହେ ସାତ ଦିନ ଉପାସେ ତୋତେ ପାଇଛି ମୁହିଁ,

ଭୋକ ମେଣ୍ଟାଇବି ଆଜି ମୁଁ ତୋର ରକତ ପିଇ।

ଥର ଥର କଣ୍ଠେ ବଉଳା କହେ ହୋଇ କାତର,

ପିଇଲେ ପିଅ ମୋ ରକତ ଶୁଣ ଗୁହାରି ମୋର।

ଆସିଥିଲି ଘରେ ଛାଡି ମୁଁ ମୋର କଅଁଳା ପିଲା,

କାନ୍ଦୁଥିବ ହୋଇ ବିକଳ ହେବଣି ସେ ଭୋକିଲା।

ଦୟାବହି ମୋତେ କ୍ଷଣକ ପାଇଁ ଛାଡିବ ଯେବେ,

କ୍ଷୀର ଦେଇ ଶିଶୁ ସନ୍ତାନେ ଫେରି ଆସିବି ତେବେ।

ଶେଷ ଥର ପାଇଁ ତା ମୁଖ ଥରେ ଆସିବି ଦେଖି,

ଏତିକି ମାଗୁଣି ମୋହର ସତେ ପାରିବ ରଖି?

ବଉଳା ବଚନେ କି ଭାବି ମନେ କିସ ବିଚାରି,

ବାଘ ବୋଲେ ଯାଅ ବଉଳା ନିଶ୍ଚେ ଆସିବ ଫେରି।

ଉପସ୍ଥାପନା: ସୁଚେତା ପ୍ରଧାନ

#ଧ୍ବନିପ୍ରତିଧ୍ବନି

Spread the love

admin

Next ଚଉଷଠି ଯୋଗିନୀ ମନ୍ଦିର »

Previous « ଆମ ଲୋକସାହିତ୍ୟ

View Comments

Saswat says:

April 18, 2022 at 5:01 am

I want full version of this can you plz provide
- admin says:
  
  April 23, 2022 at 3:56 pm
  
  OK, will try
  
  Thanks