ଲେଖା: ଫ୍ରାନସିସ ଶତପଥୀ
ଆମ ସମୟର ଉଦୀୟମାନ ଯୁବକବି ଫ୍ରାନସିସ ଶତପଥୀଙ୍କ ସୃଷ୍ଟିରେ ଉତ୍କଳ ଜନନୀଙ୍କ ଜୟଗାନ ‘ଉତ୍କଳ ଦିବସ’ କବିତା . .
~ ଉତ୍କଳ ଦିବସ ~
ଓଡ଼ିଆ ମୋ ଭାଷା ନୁହେଁ,
ସିଏ ମୋ ସଂସ୍କାର;
ଓଡ଼ିଶା ମୋ ରାଜ୍ୟ ନୁହେଁ,
ମୋ’ ଷଠିଘର।
‘ଉଡ଼ିୟା’, ‘ଓରିୟା’ ନୁହେଁ,
ଓଡ଼ିଆ ‘ଓଡ଼ିଆ’;
‘ଉଡ଼ିଶା’, ‘ଓରିସା’ ନୁହେଁ,
ଓଡ଼ିଶା ତା’ ମା’ ।
ଉଡ୍ର, ଉତକଳ ଅବା
କଳିଙ୍ଗ ପ୍ରଦେଶ;
ବୀର ପ୍ରସବିନୀ ସଦା
ଜଗନ୍ନାଥ ଦେଶ।
ଏ ମାଟିରେ ନରହନ୍ତା
ପାଲଟେ ଶ୍ରମଣ;
ଏ ଜାତିର ରକ୍ତ ଲେଖେ,
ଦୟାର ପୁରାଣ ।
ଏ ମାତାର ବୀର କେବେ
ଭୁଲି ନାହିଁ ରଣ;
ଶେଷ ରକ୍ତ ବିନ୍ଦୁ ଢାଳି,
ଶୁଝେ ମାତୃଋଣ।
ଏ ମାଟିର ତରବାରୀ
ଶିଖାଏ କୌଶଳ;
ରାଜାପୁଅ ଥାଟଛାଡ଼ି
ସାଜଇ ଚଣ୍ଡାଳ ।
ଏ ମାଟି ପାଇକପୁଅ
ଦେଖିନାହିଁ ପଛ;
ପ୍ରାଣ ପଛେ ଚାଲି ଯାଉ
ନୋଇଁ ନାହିଁ ମୁଣ୍ଡ ।
କିଏ ଏଠି ଘରଭୁଲି
ପରବନ୍ଧୁ ସାଜେ;
ସ୍ୱାଭିମାନ ପାଇଁ କିଏ
ବଞ୍ଚଇ ଦାରିଦ୍ର୍ୟେ।
ଏ ଭୁଇଁର ଲେଖନୀରୁ
ଝରେ ଦିବ୍ୟସ୍ରୋତ;
ଭକ୍ତି, ପ୍ରୀତି, ମୈତ୍ରୀ, ଶକ୍ତି
ପରମ ନିଃସୃତ ।
ଏ ମାଟିର କାରିଗର
ନିହାଣ ମୁନରେ;
ଖୋଦିପାରେ ବଇକୁଣ୍ଠ
ରୁକ୍ଷ ପଥରରେ।
ଏଠି କୋଇଲିର କୁହୁତାନ
ବସନ୍ତ ଜଣାଣ;
ହିଡ଼ମାଟି, ନଦନଦୀ
ଗାଏ ମଧୁତାନ।
ଏ ଭୂମିର ବଇଭବେ
ସରଗ ସରମେ;
ନୀଳ-ସବୁଜ-ସ୍ୱର୍ଣ୍ଣିମ
ରାଜ୍ୟ ଧରାଧାମେ।
ଓଡ଼ିଆ ମୋ ପରିଚୟ
ମିଠା ଅହଂକାର;
ମୁଁ ଓଡ଼ିଶାର ନୁହେଁ,
ଓଡ଼ିଶା ମୋହର ।।
©fsatapathy