ଲେଖା: ତ୍ରିଲୋଚନ ସ୍ୱାଇଁ
~ ଗତେଶ୍ୱର ମନ୍ଦିର ~
ଅନନ୍ତ ଓ ଅସୁମାରୀ କୀର୍ତ୍ତିରାଜିରେ ଭରା ଆମ ଏ ଓଡ଼ିଶା ଭୂଖଣ୍ଡ l ହିରଣ୍ୟଗର୍ଭା ଆମ ଏ ପବିତ୍ର ମାଟିର କୋଣାନୁକୋଣରେ କେତେ ଯେ ଦେଉଳ, କେତେ ମଠ ଓ ମନ୍ଦିର l ଧର୍ମ, ସାହିତ୍ୟ, ସଂସ୍କୃତି, ନୃତ୍ୟ ଓ ସଂଗୀତ କେତେ ଯେ ଉତ୍କୃଷ୍ଟ କଳାରେ ଭରା ଏଇ ଉତ୍କଳ ପ୍ରଦେଶ l ଗୌରବମୟ ଆମ ଅତୀତ ଓ ଇତିହାସ l
![](https://antarangakalinga.org/wp-content/uploads/2022/01/g4-135x300.jpg)
![](https://antarangakalinga.org/wp-content/uploads/2022/01/g2-135x300.jpg)
ଜଗତସିଂହପୁର ଜିଲ୍ଲାର କେତୋଟି ପ୍ରାଚୀନ ମନ୍ଦିରମାନଙ୍କ ମଧ୍ୟରେ #ବିଅଁଳ ଗାଁର ଗତେଶ୍ୱର ମହାଦେବ (ପ୍ରକାରାନ୍ତରେ ଗତନାଥେଶ୍ୱର ମହାଦେବ)ଙ୍କ ପ୍ରସିଦ୍ଧି ସୁଦୂରପ୍ରସାରୀ l ମନ୍ଦିର ବାବଦରେ ସମ୍ୟକ ଧାରଣା ନ ଥାଇ ଆମେ କେଇଜଣ ଆଗ୍ରହୀ ବନ୍ଧୁ ଯାଇଥିଲୁ ଉକ୍ତ ପୀଠକୁ, ‘ଅନ୍ତରଙ୍ଗ କଳିଙ୍ଗ ଐତିହ୍ୟ ଯାତ୍ରା’ର ଏକ ପର୍ବ ଭାବେ !
![](https://antarangakalinga.org/wp-content/uploads/2022/01/g3-300x135.jpg)
![](https://antarangakalinga.org/wp-content/uploads/2022/01/g7-135x300.jpg)
ଗତେଶ୍ୱର ମନ୍ଦିର ପୂଜକଙ୍କ କହିବା ଅନୁଯାୟୀ ମନ୍ଦିରର ସମ୍ପୂର୍ଣ୍ଣ ଇତିହାସ ଅଜଣା । ତେବେ ବିଶ୍ୱାସ କରାଯାଏ ଯେ, ଆଜକୁ ପ୍ରାୟ ୪୦୦ ବର୍ଷ ପୂର୍ବେ #ପଟିଆ ରାଜା ଏ ଅଞ୍ଚଳକୁ ବିଜେ କରୁଥିବା ସମୟରେ ଏ ସ୍ଥାନର ମାହାତ୍ମ୍ୟ ବାବଦରେ ଅବଗତ ହେଇଥିଲେ !
![](https://antarangakalinga.org/wp-content/uploads/2022/01/g5-135x300.jpg)
କିମ୍ବଦନ୍ତୀ କହେ, ଜଣେ ଗାଈଆଳର ଦୁଧିଆଳୀ ଗାଈର ଚୀରରୁ ପ୍ରତିଦିନ ନିର୍ଦ୍ଧିଷ୍ଟ ଏକ ସ୍ଥାନରେ ନିୟମିତ କ୍ଷୀର ଝରୁଥିଲା l ଏହି ଆଶ୍ଚର୍ଯ୍ୟ ଘଟଣା ଦେଖି ଅଭିଭୂତ ହୋଇଥିଲେ ରାଜା ! ସ୍ଥାନଟି ଯେ ଭଗବତଶକ୍ତିରେ ପ୍ଳାବିତ ଏ କଥା ଅନୁଭଵ କରିଥିଲେ ଶିବଭକ୍ତ ରାଜା ! ଅବିଳମ୍ବେ ଦେଉଳଟିଏ ତୋଳିଦେଇଥିଲେ ସେ ! ଦିଅଁଙ୍କ ନୀତିକାନ୍ତି ନିମନ୍ତେ କିଛି ବ୍ରାହ୍ମଣଙ୍କୁ ଦାୟିତ୍ଵ ଦେବା ସହିତ ଭୂସମ୍ପତ୍ତି ଖଞ୍ଜା ଦେଇଥିଲେ !
![](https://antarangakalinga.org/wp-content/uploads/2022/01/g6-300x135.jpg)
ମଣ୍ଡାସାହି, ବିଅଁଳ ଆଦି ଅଞ୍ଚଳ ବାହାରେ ବିଶେଷ ପରିଚିତ ନ ଥିଲେ ମଧ୍ୟ ମନ୍ଦିରଟି ଏକ ଅନନ୍ୟ ପୀଠ ସତ ! ଗତେଶ୍ୱର ମହାଦେବଙ୍କ ଆଶିଷ ତଥା ଆଧ୍ୟାତ୍ମିକତାରେ ସିକ୍ତ ଗ୍ରାମବାସୀ ତଥା ଅନ୍ୟ ଅନେକ ବଦାନ୍ୟ ବ୍ୟକ୍ତିଙ୍କ ଅକୁଣ୍ଠ ସାହାଯ୍ୟ ସହଯୋଗରେ ମହାଦେବଙ୍କ ପାଇଁ କେଇବର୍ଷ ପୂର୍ବେ ଏହି ମନ୍ଦିରର ଆନୁସଙ୍ଗିକ ଉନ୍ନତି ହୋଇପାରିଛି l
![](https://antarangakalinga.org/wp-content/uploads/2022/01/g8-135x300.jpg)
![](https://antarangakalinga.org/wp-content/uploads/2022/01/g12-135x300.jpg)
ଆମ୍ଭର ଯାତ୍ରା କାଳରେ ଦିଅଁ ଥିଲେ #ଜଳାଶାୟୀ ! ମନ୍ଦିରରେ ଭକ୍ତଙ୍କ ଗହଳି ନ ଥିଲେ ମଧ୍ୟ ଜାଗର ଏବଂ ଅନ୍ୟାନ୍ୟ ପର୍ବପର୍ବାଣରେ ଭକ୍ତଙ୍କ ଭିଡ଼ ଜମେ ! ଭାବଗଦଗଦ ଭାବେ ବରିଷ୍ଠ ପୂଜକ ମହାଶୟଙ୍କ ତୁଣ୍ଡରେ ମହାପ୍ରଭୁଙ୍କ ମହିମାଗାନ ସହିତ ମନ୍ଦିରର ସୁନ୍ଦର ପରିବେଶ, ମନ୍ଦିର ପରିସରର ନୂତନ ଯଜ୍ଞମଣ୍ଡପ ଓ ଆନୁସଙ୍ଗିକ ସୁବିଧାଗୁଡ଼ିକର ନିର୍ମାଣ, ସୁନ୍ଦର କ୍ଷୁଦ୍ର ଉଦ୍ୟାନ ସର୍ବୋପରି ବହୁ କିମ୍ବଦନ୍ତୀର ନାୟିକା ମନ୍ଦିରର ବିଶାଳ ପୁଷ୍କରିଣୀ ଦେଖି ଆମେ ଚକିତ ହେଇଥିଲୁ ନିଶ୍ଚୟ !
![](https://antarangakalinga.org/wp-content/uploads/2022/01/g10-135x300.jpg)
![](https://antarangakalinga.org/wp-content/uploads/2022/01/g11-135x300.jpg)
ଅନ୍ତରଙ୍ଗ କଳିଙ୍ଗର ବନ୍ଧୁମାନଙ୍କୁ ଅନୁରୋଧ, ଜଗତସିଂହପୁର ଆଉ କଟକ ରାସ୍ତାର ଚାରିପଲୀଆ ଠାରୁ ମାତ୍ର ୧୦/୧୨ କି.ମି. ଦୂରର ଏଇ ଗତେଶ୍ୱର ମନ୍ଦିର ଥରେ ଦର୍ଶନରେ ଯାଆନ୍ତୁ ଆଉ ମହାପ୍ରଭୁଙ୍କ ଦିବ୍ୟଦର୍ଶନ ଓ ଆଶିଷ ଲଭନ୍ତୁ ।
![](https://antarangakalinga.org/wp-content/uploads/2022/01/g9-300x135.jpg)