ପତିତପାବନ

ଲେଖା: ଦେବ ତ୍ରିପାଠୀ

ନୀଳକନ୍ଦର ବାସୀ ଜଗତର ନାଥଙ୍କୁ ଦର୍ଶନ କରିବା ଅଭିଳାଷରେ ଶ୍ରୀକ୍ଷେତ୍ରକୁ ଛୁଟି ଆସନ୍ତି ଅସୁମାରୀ ଭକ୍ତ, ଦୁନିଆର କୋଣ ଅନୁକୋଣରୁ । ମାତ୍ର ବଡ଼ଦେଉଳର ଗର୍ଭଗୃହରେ ଚତୁର୍ଦ୍ଧାମୂର୍ତ୍ତିଙ୍କ ଦର୍ଶନର ସୌଭାଗ୍ୟ ସମସ୍ତଙ୍କୁ ମିଳେନା ।

ଯେଉଁ ଭାବାବେଗୀ ଭକ୍ତମାନେ ନିୟମତଃ ଶ୍ରୀମନ୍ଦିରକୁ ପ୍ରବେଶ କରି ପାରନ୍ତି ନାହିଁ, ସେମାନେ ଅରୁଣସ୍ତମ୍ଭ ନିକଟରେ ଥାଇ ସିଂହଦ୍ଵାର ଗୁମୁଟ ଭିତରେ ଦକ୍ଷିଣ ପାର୍ଶ୍ଵରେ ପତିତପାବନ ଭାବରେ ବିଦ୍ୟମାନ ଥିବା ଜଗନ୍ନାଥ ପ୍ରତିମାଙ୍କୁ ଦର୍ଶନ କରିଥାନ୍ତି । ପତିତମାନଙ୍କୁ ଭବସାଗରରୁ ଉଦ୍ଧାର କରୁଥିବାରୁ ଜଗନ୍ନାଥଙ୍କ ଅନ୍ୟ ନାମ ପତିତପାବନ ।

~ ଫତେ ହନୁମାନ ~
ସିଂହଦ୍ଵାର ଗୁମୁଟର ପ୍ରବେଶ ପଥ ବାମ ପାର୍ଶ୍ୱରେ ରାଧାକୃଷ୍ଣ, ଗଣେଶ, ଦୁର୍ଗାଙ୍କ ସହିତ ଫତେ ହନୁମାନଙ୍କ ଚିତ୍ର ପ୍ରତିମା ବିଦ୍ୟମାନ । ପରମ ଭକ୍ତ ଫତେ ହନୁମାନ ଗୁମୁଟ କାନ୍ଥରେ ଏକ ଠଣା ସଦୃଶ କ୍ଷୁଦ୍ର ମନ୍ଦିରରେ ବିରାଜିତ । ପୂର୍ବ ଦିଗରୁ ଶ୍ରୀମନ୍ଦିରର ସୁରକ୍ଷା ଦାୟିତ୍ବରେ ଅଛନ୍ତି ହନୁମାନ । ପୂର୍ବଦ୍ଵାରର ରକ୍ଷକ ଏବଂ ପଞ୍ଚ ରାମାନନ୍ଦୀଙ୍କ ଆରାଧ୍ୟ ହେଉଛନ୍ତି ହନୁମାନ ।