Physical Address
ଖଟବିନ୍ ସାହି, ବକ୍ସି ବଜାର, କଟକ, ଓଡିଶା
ଲେଖା: ଦେଵ ତ୍ରିପାଠୀ
ଶୀତ ଆସିଲେ ଆମେ କେବେ କେବେ ଯୋଜନା କରୁ ଚିଲିକା ବୁଲିବା ପାଇଁ ! ପ୍ରକୃତିର ସେଇ ସନ୍ତାନସନ୍ତତିମାନେ ମଧ୍ୟ ଯୋଜନା କରନ୍ତି ଚିଲିକା ବୁଲିବା ପାଇଁ, କେହି ଅବା ଇଚ୍ଛନ୍ତି ଓଡ଼ିଶା ଭୂଇଁର ଆଉ ଏକ ଅପୂର୍ବ ପ୍ରାକୃତିକ ନୈସର୍ଗିକ ଶୋଭାର ଭଣ୍ଡାର ତଥା ଗୌରବମୟ ଐତିହ୍ୟର ଭଣ୍ଡାର ଭିତରକନିକାକୁ !
କେନ୍ଦ୍ରାପଡା ଜିଲ୍ଲାର ଭିତରକନିକାର ମନଲୋଭା ପରିବେଶ ଓ ଜଳଜଗତର ରହସ୍ୟ ହାତଠାରି ଡାକେ ସେମାନଙ୍କୁ ! ସୁଦୂର ରୁଷିଆ, ସାଇବେରିଆ କାଇଁ କେଉଁ ଦେଶରୁ ଉଡିଆସନ୍ତି କମନ୍ ପୋଚାର୍ଡ୍ ସମେତ ଲକ୍ଷ ଲକ୍ଷ ବିଦେଶୀ ପକ୍ଷୀ ! ସେମାନେ ଭଲପାଆନ୍ତି, ଭିତରକନିକାର ଜଳକୁ, ସେମାନଙ୍କୁ ଭଲଲାଗେ ଭିତରକନିକାର ଶୀତ, ପ୍ରକୃତି, ଜୈବବିବିଧତା ! ସ୍ବଳ୍ପ ସମୟ ପାଇଁ ହେଲେ ମଧ୍ୟ ଏଇ ଭିତରକନିକା ହୋଇଯାଏ ସେମାନଙ୍କର ଅନ୍ତରଙ୍ଗ, ଆତ୍ମୀୟ ! ପଛରେ ରହିଯାଏ ମାତୃଭୂମି !
ସତକଥା ! ଭିତରକନିକା ଅଞ୍ଚଳର ଗାଡିଆ ପୋଖରୀ ନଦୀ ନାଳ ବିଲ ବନ ଚାରିଆଡେ ମଧ୍ୟ ଶୁଣିବାକୁ ମିଳେ ଏଇ ବିଦେଶୀ ଚଡେଇମାନଙ୍କର କାକଳି । ଶୀତଋତୁରେ ନିଆରା ରଙ୍ଗରେ ରଙ୍ଗେଇ ହୋଇଯାଏ ଭିତରକନିକା !
ଇରାନ, ଇରାକ, ଅଷ୍ଟ୍ରେଲିଆ, ଲଦାଖ, ସାଇବେରିଆ, ହିମାଳୟ ଉପତ୍ୟକା ଓ ମେରୁ ଅଞ୍ଚଳ ଆଦିରୁ ଏହି ପକ୍ଷୀମାନେ ଟିକିଟିକି ଡେଣା ହଲାଇ ହଜାର ହଜାର ଲକ୍ଷ ଲକ୍ଷ କିଲୋମିଟର ଉଡି ଆସିବା ନିଶ୍ଚିତ ଭାବରେ ପ୍ରକୃତି ମା’ର ଅବଦାନ ଓଡ଼ିଶା ପ୍ରତି !ସତରେ ପ୍ରକୃତି ବହୁତ ଦେଇଛି ଆମ ଓଡ଼ିଆଙ୍କୁ, ଆମେ ଚିହ୍ନିପାରିଲେ ହେଲା ! ଚିହ୍ନି ମୂଲ୍ୟାୟନ କରିପାରିଲେ ହେଲା !
