ଉପସ୍ଥାପନା: ଶିଶିର ସାହୁ ମନୋଜ
ଗୋଣ୍ଡି ପୁନେମ ଦର୍ଶନ ଅନୁସାରେ ଗୋଣ୍ଡି ଭାଷାର କିପରି ଉତ୍ପତ୍ତି ହୋଇଛି ତାହାର ପରିଚୟ ମିଳିଥାଏ । ଏଥିରେ ଉଲ୍ଲେଖ ରହିଛି ଯେ ଶମ୍ଭୁଶେକଙ୍କର ଡମ୍ଵରୁରୁ ଗୋଣ୍ଡି ଭାଷା ଉତ୍ପନ୍ନ ହୋଇଛି ।
ଏହି ଶମ୍ଭୁଶେକ ବହୁତ ସମ୍ଭଵ ଶିଵଶଙ୍କର ଭଗବାନଙ୍କ ଵ୍ଯତୀତ ଆଉ କେହି ନୁହନ୍ତି । କୁହାଯାଏ ଗଣ୍ଡ ଆଦି ଧର୍ମଗୁରୁ ପାରିକୁପାର ଲିଙ୍ଗୋ ସେହି ଶମ୍ଭୁଶେକ ଦେଵତାଙ୍କର ସେହି ଡମ୍ବରୁ ଧ୍ଵନିକୁ ଶୁଣି ଗୋଣ୍ଡି ଭାଷାକୁ ରଚନା କରିଥିଲେ ।
ଡମ୍ବରୁ ଶବ୍ଦକୁ ଶୁଣି ସେହି ସ୍ଵରରେ ସେ ଵର୍ଣ୍ଣ, ଶବ୍ଦ ଏଵଂ ଵାକ୍ଯ ତିଆରି କରୁ କରୁ ଗୋଣ୍ଡି ବୋଲି ଏକ ନୂଆ ଭାଷା ସୃଷ୍ଟି କରି ଦେଇଥିଲେ । ଏହାକୁ ହିଁ ଗୋଏନ୍ଦାଡ଼ୀ ଵାଣୀ ଵା ଗଣ୍ଡଵାଣୀ କୁହାଯାଏ । ଗୋଣ୍ଡି ଭାଷାରେ ଡମ୍ବରକୁ ଗୋଏନ୍ଦାଡ଼ୀ କୁହାଯାଏ ।
ଅଵଶ୍ୟ ଏହି ଲୋକକଥା କେଵଳ ଏକ ଲୋକଵିଶ୍ଵାସ ନା ଏହ ପଛରେ କୌଣସି ଐତିହାସିକ କଥା ରହିଛି ତାହା ନିଶ୍ଚୟ ଗଵେଷଣା ସାପେକ୍ଷ । ତେଵେ ଗୋଣ୍ଡ, ଗୋଣ୍ଡି, ଗଣ୍ଡ, କୋଣ୍ଡା, କୋଟିଆ, କନ୍ଧ ଓ କୋୟା ଇତ୍ୟାଦି ଏ ସମସ୍ତ ଶବ୍ଦର ମୂଳ ହେଉଛି ଏକ ଦ୍ରାଵିଡ ଶବ୍ଦ କୁ ଵା କୋ ଏଵଂ ଏହାର ଅର୍ଥ ପର୍ଵତ ଅଟେ । ସେଇଭଳି ଦ୍ରାଵିଡ ଜନଜାତି ଗୁଡ଼ିକର ଗୋଣ୍ଡ, କୋଣ୍ଡା ଓ କନ୍ଧ ଇତ୍ୟାଦି ନାମକରଣର ଅର୍ଥ ମଧ୍ୟ ସ୍ପଷ୍ଟ ହେଉଛି ଯେ ସେମାନେ ପର୍ଵତଵାସୀ ଅଟନ୍ତି । ତେଵେ ସମୟ ସହ ଗୋଟିଏ ପଟେ ଦକ୍ଷିଣ ଭାରତର ଦ୍ରାଵିଡ ଲୋକେ ସମତଳରେ ଵସତିସ୍ଥାପନ କରିଵା ଶିଖିଗଲାଵେଳେ ଉତ୍ତର ଭାରତର ଗୋଣ୍ଡ ଜାତି ମଧ୍ୟ କେତେକ ଅଞ୍ଚଳରେ ଶାସନ କରିଵା ଆରମ୍ଭ କରିଦେଇଥିଲେ । ଓଡ଼ିଶାରେ ମଧ୍ୟ ଅନୁଗୋଳ ଠାରୁ କନ୍ଧମାଳ ଓ ନଵରଙ୍ଗପୁର ପର୍ଯ୍ୟନ୍ତ ଅଞ୍ଚଳରେ ଅନେକ ଵର୍ଷ ଯାଏଁ ଏହି ଯୁଦ୍ଧପ୍ରିୟ ଜାତିର ପ୍ରତ୍ଯକ୍ଷ କ୍ଷମତା ରହିଥିଵା ଜଣାଯାଏ ।
କୁ ଓ କୋ ଶବ୍ଦ ସହିତ ସମଦ୍ଧୃତ ଓ ସମସାଦୃଶ୍ଯ ଥିଵା ପର୍ଵତ ଅର୍ଥଜ ଅନେକ ଶବ୍ଦ ଦ୍ରାଵିଡ ଭାଷା ପରିଵାରର ଵିଭିନ୍ନ ଭାଷାରେ ମିଳିଯାଏ ଏଇ ଯେମିତି କୁଈ ଭାଷାରେ ପାହାଡ଼କୁ “କୁପ୍’ଡା଼” କୁହାଯାଏ ଠିକ୍ ସେଇଭଳି ତାମିଳରେ #குட்டரி (kuṭṭari) ବୋଲି ଏକ ଶବ୍ଦ ରହିଛି ଯାହାର ଅର୍ଥ ପାହାଡ଼ ଵା ପର୍ଵତ ଅଟେ ।
© ଶବ୍ଦଭେଦ